朱晨麗抱譚俊彥囡囡過足媽媽癮
狄龍兒子譚俊彥帶住愛女譚晴為新劇開工，想不到晴晴一到現場即時搶走父親風頭！拍檔朱晨麗更被融化，抱實晴晴不放化身兼職保母，笑言過足「媽媽癮」！而忙拍動作場面的譚俊彥亦不時以眼神關切愛女動向，父愛滿分。
藝人朱晨麗、譚俊彥（Shaun）、林師傑等日前到何文田為新劇《特技人》拍攝舞獅戲份，劇情講到Shaun率領舞獅隊賀酒吧開幕，突然另一隊舞獅殺出「搶青」，兩隊人展開較勁。難得在寓所附近開工，Shaun在拍攝期間抽空接送女兒譚晴返學放學，更安排她在現場睇爸爸演戲。晴晴眼仔睩睩四圍望超可愛，朱朱即母愛大發，化身保母抱實唔放。
生B？日日開工！
Shaun負責舞獅頭，在囡囡監場下分外落力，他透露囡囡愛睇舞獅：「佢鍾意睇啲熱鬧場面，日日都開工，難得有機會畀佢見識吓，之後拍撞車同跳樓就唔得喇！（囡囡好乖！）梗係啦！有姐姐請食嘢嘛，成日畀佢食糖，小朋友唔食得咁多糖o架！」身旁的朱朱聞言即傻笑，連日拍動作戲的她笑言演「大頭佛」可以喘息一下，問到靚樣被遮會否可惜？她說：「唔緊要，會有個鏡頭見到我個樣。（見到小朋友就母愛大發？）要多謝Shaun畀機會我過吓媽媽癮，做Part-time保母！（搵番個對象生B？）日日開工，瞓覺都唔夠喎！」
Shaun早前為父親狄龍添男孫，問到狄龍有否偏心孫仔？Shaun笑說：「我覺得佢係偏心孫女嘅，始終係第一個孫，其實我都偏心個女多啲！（因為囡囡嗲功了得？）私人嘢我唔方便透露喎！（囡囡睇你拍戲多會恨入行？）佢有條件當然會栽培佢，依家都係專心讀書先！」
文：影視組