吳京自認好打冇畀人恰

吳京與女星盧靖姍主演新片《戰狼II》昨晚於香港舉行首映禮，因該片已在內地上映一段時間，並創下中國電影史上最高票房紀錄，截至昨日票房已接近56億人民幣，成績驕人！而該片的成功，亦令吳京一些舊事被翻炒，有傳他當年在香港拍《殺破狼》時曾與甄子丹結怨，對此，吳京親自解說：「九十年代喺內地畀人恰過，嚟到香港亦曾被迫去學廣東話。（香港拍戲有冇畀人恰？子丹有冇？）我識打，冇畀人恰。（你同子丹邊個好打啲？）我哋都係打麻雀比較好，大家都係拍電影少挑撥。」

與子丹飯敍

吳京直言早前曾因袁和平的關係，跟甄子丹、李連杰飯敍：「前陣子，我同子丹、李連杰見過面，地點保密，大家都是跟師傅八爺（袁和平）習武，佢（甄子丹）都有恭喜我。（會唔會合作？）要睇緣分畀唔畀機會我哋。」雖然與子丹有結怨傳聞，但亦有指拍《殺破狼》時子丹曾拍枱叫電影公司加吳京戲份，對此，吳京說：「咁我唔知，要問番導演，我嗰陣係客串，對白得一句，如果冇埋，會酷好多。」

票房大收贖番層樓

對於新戲在內地票房大收，吳京指電影上映後是好是壞，全留給觀眾評價，現在票房達標，令吳京鬆一口氣，因為電影超支不少，製作費達兩億人民幣，他很感謝朋友的幫忙，令到他可以完成任務，他說：「我最怕欠咗人，依家可以鬆口氣。（之前拍戲要按樓？）係呀！啱啱先贖番，唔使再租樓住。（點解揀香港做最後一站？）因為香港係我電影夢嘅開始，拍香港戲令我學到好多嘢。」對於有指今次吳京在港搞首映，有衣錦還鄉之意，他說：「唔係，我心情好緊張，套戲都有啲瑕疵。（內地票房咁好，吐氣揚眉啦？）壓力仲大，唔知下一套拍乜好。」

盧靖姍戥戰友開心

至於此片女主角32歲的盧靖姍（Celina）坦言十年前已認識吳京，現時票房大收，好戥對方開心，她說：「知道佢好努力，同佢經歷多高高低低。」問她拍完此片有甚麼得着？本身是中美混血兒的她坦言母親是香港人，對方曾問她為何不向內地發展，直至兩年前媽媽患重病，她跟對方說做女主角，其母即時很有動力，表示很想看首映及想探班，Celina說：「作為個女好開心，還咗母親一個心願。」她又透露已接下一部電影，問到有否加片酬？她指此片未上映時已接，因為很欣賞這個導演，說到應該叫吳京分紅，她說：「點解香港記者成日問呢啲問題，做人唔好貪心。」

文：影視組