雷莊𠒇獲牙醫男友撐唔使箍牙

出爐香港小姐冠軍雷莊𠒇、亞軍何依婷、季軍黃瑋琦與big big channel最受歡迎香港小姐張寶欣昨日到銅鑼灣出席領獎活動。星期日晚的《2017香港小姐競選決賽》有24.4點收視，約有158萬觀眾捧場，賽果已成定局，但雷莊𠒇繼續被網民狙擊批評其樣貌及惡搞，面對負評，她的心情似乎未受影響，昨日在社交網晒一件頭泳衣照，又狂揈頭髮。

有時間情願瞓覺

活動上，雷莊𠒇回應惡搞時笑說：「冇時間睇，有時間情願瞓覺，冇受影響，好攰瞓得好好。（網民話你直播回應得寸嘴？）佢哋唔明我意思，因為自己英文好啲先用英文講，我意思係希望大家唔好聽咁多負面嘢，多啲正能量，唔想大家嗌交。呢啲嘢對我冇影響，我好開心，有時間會再玩直播。（認真睇吓負評？）唔想嘥時間去睇呢啲嘢，呢啲對我學習冇幫助。」

放大圖片	黃瑋琦（左起）、雷莊𠒇、何依婷及張寶欣現身港姐領獎活動。

遭網民惡搞的雷莊𠒇認為哨牙沒有問題，自信笑得燦爛：「我牙醫男友覺得好奇怪，點解啲人會覺得我棚牙有問題要做手術？（男友幫你睇過牙？）有，佢話我牙齒冇問題。（男友戥你唔開心？）我哋視像傾偈唔會嘥時間講呢啲。（佢嚟香港探你？）未知，佢已經係牙醫，但係要喺加拿大深造六年。（分隔兩地唔驚分手？）我哋對大家都好有信心。」

黃瑋琦預告同居

何依婷力撐雷莊𠒇性格樂觀，她自言沒有男友，會買衫獎勵自己。黃瑋琦則透露與雷莊𠒇或會「同居」一齊租屋住。活動後，雷莊𠒇換了便裝返回入住的酒店，逗留一會後，她拿着大袋東西往附近咖啡店，穿緊身上衣、超短熱褲的她，騷長腿兼晒股邊，期間與男店員傾到笑笑口，及後她乘的士往北角的大廈。

另外，大熱倒灶的落選港姐伍樂怡玩直播時表示由媽媽駕車送到電視城，相信是洽談新工作。

文：影視組

攝：追蹤組