胡定欣放飛機陳山聰嬲豬嗌離婚
陳山聰與好友林夏薇計劃為即將生日的胡定欣秘密慶祝，怎料生日會主角竟然「甩底」，大受打擊的山聰即宣布與胡定欣感情破裂：「我又離多次婚喇！」
藝人胡定欣、姚子羚、陳山聰、張秀文等昨日到油塘宣傳進入結局周的熱播劇《同盟》，子羚騷香肩晒長腿、秀文則以吊帶背心吸睛。玩遊戲時，想不到身形單薄的子羚，在爭櫈仔環節中表現兇狠，一手搶走櫈仔令秀文跌倒，變滾地葫蘆！
兩Pair撐枱腳
山聰日前在社交網大呻與林夏薇齊被「放飛機」，他直指是好友胡定欣「所為」：「生日嗰位冇嚟囉，我又離多次婚喇！我同胡定欣離婚呀！我同薇薇叫定欣出嚟慶祝，佢都話出嚟o架，但訂晒位最後又冇到囉！得我哋兩Pair人食飯，到餐廳經理推個蛋糕出嚟問邊個生日，問完薇薇又問我女友！（再約過？）睇吓佢得唔得閒囉！（佢正日係咪約咗男仔？）唔知喎！如果佢約男友，我哋一班兄弟姊妹唔會阻佢。」
答應雙倍奉還
而定欣就山聰的「指控」回應說：「我前日喺馬來西亞返，可能機上空氣唔好，搞到鼻敏感流鼻水，出唔到嚟，我應承咗佢哋下次雙倍奉還o架！（約咗男仔所以甩底？）有都好呀，但我唔會重色輕友！」講到踏入結局，劇情風起雲湧，被問到是否Sad Ending？定欣笑言：「有啲sad又有啲希望咁啦！啲Sad戲同喊戲交晒畀子羚！」而子羚日前一場喪兄爆喊戲大獲好評，她笑言：「要多謝演大哥嘅楊證樺畀好多眼神我，幫咗我好多。」
文：影視組