用麻雀鎖住老公袁詠儀笑Chilam城城廢柴
藝人袁詠儀（靚靚）與老公張智霖（Chilam）是圈中模範恩愛夫婦，日前靚靚接受奇妙電視節目《天下第一Friend》訪問，竟公然叫老公「廢柴」！原來她在節目中發表「四條廢柴愛打牌」言論，並笑指老公、郭富城（阿城）、沈嘉偉及一位圈外朋友榜上有名：「因為佢哋玩起嚟真係好廢！譬如Chilam同我講話夜晚去打牌，我問佢點解，佢就答因為阿城聽日走，到咗第二日又去打牌原因係阿城返咗嚟，你話廢唔廢？」
唔畀去街即黑面
主持說：「打牌總好過花天酒地呀！」靚靚亦直言：「所以我咪由得佢去囉，至緊要識得返屋企！」個性直率的她亦提及曾被指得罪不少圈中人：「以前哥哥（張國榮）同梅姐（梅艷芳）都話過我，哥哥仲話我花無百日紅，叫我檢點啲，但我把口硬係快過個腦！」
對於「廢柴」論，靚靚接受本報電話訪問時笑言：「佢四個都知自己去玩嘅理由好廢，例如『Welcome』同『Farewell』朋友，希望理由有建設性啲。」更笑言試過叫Chilam不要應約：「佢真係唔出去，但會黑面同撳電話，跟住我電話就會係咁響，其餘三個人打電話嚟問我：『可唔可以出嚟食飯？』」為免不近人情，靚靚初時會跟老公一同應約，她笑說：「但日日係咁唔係辦法，會殘，所以由佢哋自己去玩。」
靚靚笑言不時有新成員加入聚會，她也會勸新成員的太太不用動氣，因為他們不是去花天酒地。問到阿城現時會否減少去朋友聚會？靚靚說：「結咗婚後係乖咗。」而前日是靚靚46歲生日，前晚她在社交網上載跟Chilam及朋友慶生的照片，表示一頓溫馨的午餐和晚餐已令她很快樂。