陳曉東驚青光眼復發 腰斬生日會
再度活躍樂壇的陳曉東日前與粉絲搞生日會，有自稱「心碎的粉絲」向本報爆料，投訴當日付了入場費220元，事前表明有簽名環節，但東東只為部分粉絲簽名及合照後，以眼睛太累為由腰斬活動，更連道別都沒有，令粉絲傷心、難過，質疑東東早走是為了趕去另一個活動。
承諾補簽名
早前患急性青光眼的東東昨日接受電話訪問時解釋，因雙眼好辛苦，才被迫中止活動：「因為醫生提醒過我唔可以受太過強光，最驚復發就可能成世唔好！當時有啲頂唔順，開始睇嘢好濛，希望粉絲理解同體諒，我答應當日簽唔晒嘅粉絲，遲啲會幫佢哋補簽。」東東澄清當日並非趕往第二個活動，只是跟家人吃生日飯。而東東的經理人公司亦說：「其實可能係公司安排得唔好，搞出誤會，係公司擔心東東雙眼有乜閃失，所以就建議佢唔好繼續，冇畀佢同粉絲交代一聲，希望下次安排得妥當啲，唔好太過倉卒，希望各位粉絲見諒。」
李蕙敏想讀心理學
此外，東東昨日與李蕙敏（Amanda）出席慈善活動，東東透露生日會上收到一份特別禮物，是一個紅館模型，正頭痛如何運回北京，兩個女兒則畫畫、彈琴唱生日歌給他聽，令他甜到入心。
曾經想讀設計的Amanda坦言因財困而沒有報讀，反而機緣巧合做了歌手：「將來可以再進修嘅話，會選擇修讀心理學，原因係由演戲開始，就好有興趣想知要代入另一個角色同人格係點，加上細個想做警察，同好鍾意睇犯罪學電影。」
文：音樂組