公主抱甩手大鑊！ 袁文傑膝頭骨裂 滕麗名撻生魚

滕麗名、袁文傑、呂慧儀、湯盈盈、單立文及劉丹等，昨日到將軍澳電視城出席無綫處境劇《愛．回家之開心速遞》宣傳活動。袁文傑自爆兩星期前拍攝時不慎差錯腳，將抱住的阿滕整個人拋出，阿滕背脊落地再撞到頭，他則撞傷膝頭。二人即時接受檢查，袁文傑坦言膝蓋骨裂，幸康復進度良好，活動上依然靈活。

嚇到擘大口得個窿

袁文傑表示若康復進度不理想，可能要接受微創手術，而且非常自責：「將女主角拋落地喎！幾大鑊！嚇到我擘大個口得個窿，個心離幾離。」阿滕表示知道袁文傑內疚，沒有怪責對方：「同文傑合作係開心嘅！估唔到佢今日會自爆，如果唔係合作得咁開心，單新聞我第二日就爆出嚟，叫大家去醫院啦！」

袁文傑指膝蓋傷患康復進度良好。	單立文與湯盈盈擺心形甫士扮恩愛。	呂慧儀與鄭世豪獲劇組慶生。

呂慧儀生日收首飾

呂慧儀（阿蟹）剛於本月3日迎接35歲生日，獲劇組送上生日蛋糕，與同是本月生日的鄭世豪齊齊慶生。阿蟹透露正日與老公過二人世界，問到老公有何表示？她說：「送首飾，保值嘅，仲叫我粗戴，佢話會努力賺錢，或者叫埋蟹籽幫手賺錢。最開心當然係蟹籽錫我嗰兩啖啦！（幫蟹籽添個弟妹？）等丹爺（劉丹）宣布加幾多集先。（怕蟹籽呷醋？）都怕，上次老公同我玩作勢打我，佢竟然打番老竇！」

文：影視組