邱晴奪落選港姐冠軍 金美黎引人入性獲頒超友誼小姐
無綫今年玩破格，在港姐競選結束後，再舉行一個「big big channel落選香港小姐競選」，讓六位落選佳麗再鬥過。活動明顯只是一場搞笑騷，所頒發的獎項亦很騎呢，當中金美黎成為最踩界獎項「超友誼小姐」得主，而邱晴獲得「冠軍」殊榮，得獎時亦忍不住說了句：「呢個獎係咩嚟o架？」
前晚港姐競選圓滿落幕後，無綫舉辦了一個「big big channel落選香港小姐競選」，讓六位落選港姐(2)李清心、(3)梁雯蔚、(6)邱晴（Mandy）、(7)黃凱琪（Suki）、(8)伍樂怡及(9)金美黎再鬥過，選舉玩味甚重，主持陸永、C君與麥美恩除了頒發「冠軍」獎外，又頒發多個騎呢「豬肉獎」，當中黃凱琪奪得「最佳腳踭大獎」；李清心奪「最不上鏡大獎」；伍樂怡奪「最誘惑TVBody獎」；梁雯蔚奪「最佳髮腳大獎」；另一個較為踩界的「超友誼小姐」獎，意指得獎佳麗是網友最想與她擁有「超友誼關係」的一位，難怪金美黎得獎時亦有點無奈，她說：「嘩，多謝晒，但我淨係會一心一意揀一個男朋友咋！」除了「冠軍」獎座外，其他獎項均「環保」共用一個獎盃，現場宣布Mandy獲得「落選香港小姐冠軍」時，她率真地說了一句：「呢個獎咩嚟o架？」反應令人捧腹，擺明將競選當搞笑節目做！
冇男友被窒
節目中，陸永、C君都拿麥美恩開玩笑，取笑她當年選港姐應獲「最上吊小姐」。其後他們與落選佳麗玩「宅男女神」遊戲，要她們對着鏡頭幻想與男友傾偈，分別達成幾個目的：「氹男友層樓寫你個名」、「向男友逼婚」及「自己偷食求男友原諒」，邱晴被要求用甜言蜜語氹男友送樓，她竟自爆：「我好耐都冇男朋友喎！」主持C君聞言說：「你17歲咋喎！你7歲就有男朋友？」
節目播完後，獲得另類「冠軍」的邱晴被問到會否覺得被踩低？她笑笑口說：「唔會，都幾開心嘅。（覺得節目玩大咗？）其實都唔會，呢個比賽都幾有趣。（失落『正印』三甲，好失望？）從來都冇咁嘅心態。」Suki亦說：「其實都幾開心，因為參選有壓力，呢個節目當係一個娛樂。」至於「超友誼小姐」得主金美黎，被問到會否覺得不受尊重？她說：「初初都會諗，唔知係乜嘢嚟，當玩Game啦！（覺得唔尊重女性？）冇咁諗，覺得受異性歡迎，幾驚喜。」
麥美恩撐爭取表現
對於網民批評節目有侮辱港姐之嫌，無綫方面指賽前已與參賽者取得共識及默契，設計獎項純粹娛樂性質，絕無對女性或參賽者有任何貶意。至於農夫及麥美恩受訪時亦力撐節目，C君指這只是一場有趣的Show，並非真正比賽，旨在搞氣氛，問到會否覺得「玩得太大」？麥美恩說：「只係想好輕鬆咁等一班落選佳麗，可以喺決賽後再補充多啲時間表現自己，邊度跌低就邊度起番身，佢哋選完之後仲可以Keep住咁精神，真係唔容易，都好想喺公司再見到佢哋！」
文：影視組