菜館開張 散工投訴贈興 李家鼎霸氣反擊：夠膽出嚟對質！

李家鼎最近踩入商界，獲老闆支持、自己亦投資七位數在銅鑼灣開設的粵菜私房菜餐館昨日開張，其子李泳漢與太太及李泳豪一早到場打點，他的現任女友亦與女兒及外孫女撐場。

但熱鬧背後，有自稱前日在私房菜館做散工的人投訴贈興，爆料者指應徵侍應卻要做搬運工作，又投訴沒有收足薪酬，工作四小時只收到三小時的薪金，會到勞工處投訴。李家鼎對此表示不怕影響餐館聲譽，並豪氣地說：「把口生喺人哋度！我哋清者自清，夠膽就出嚟當面對質！」私房菜發言人則指有出足糧，當時該員工要求立即出糧，他已叫停工作，表示由工頭負責，對方就連等候時間也列入工作時間計算。至於要搬枱搬櫈，他指從事飲食行業屬正常。

做到冇停手 辛苦過拍劇

李家鼎被問到前一晚有否開心到失眠？他說：「根本冇得瞓，要做嘢。（緊張？）上星期都緊張！擔心啲裝修，怕打風趕唔切，多謝老天爺，個風打歪咗。」又表示前晚率先搞了兩圍試菜，招呼三十多人，其中一道「古法金邊方脷」食到大家Lam Lam脷：「未試過，骨都冇埋！條魚成本都2,000蚊，有錢都未必買到，係一早同漁商訂好！好多嘢我都親力親為，尋日我朝早9點做到夜晚12點，拍劇都冇咁辛苦，煮餸要全程金睛火眼！（幾耐冇假放？）至少兩個月，去到出年二月有人一連包幾晚，多謝大家畀面！一圍幾萬蚊，尋日又有兩枱有人即刻畀咗錢，人哋咁欣賞，唔可以瞞天過海，我做唔出走咗去！（荷包脹晒？）哈哈！可以再脹啲，我荷包大過荷葉呀！」

問到如此忙碌，另一半可有投訴？李家鼎以「師奶」稱呼對方說：「食鹹魚青菜好咩？」又指即使女友及兩名兒子幫襯都要排隊：「個個都要排隊，一視同仁，希望11、12月留到一圍半圍畀佢哋。」問與另一半是否未註冊？他笑說：「呢個世代問心啦！呢頭註冊都可以搵另一個。」

文：影視組