陳國峰一索得男 半裸寫真晒幸福
藝人陳國峰（Penny）今年5月宣布太太黃思雅懷孕的喜訊，至昨日「峰之子」終於出世啦！Penny指太太順利誕下重6磅1的兒子，母子平安，初為人父的他更親自入產房為囝囝剪臍帶，笑言心跳加速兼手心出汗！而在產前更大晒與大肚妻的半祼寫真，迎接幸福的新一頁。
「巨聲幫」出身的藝人陳國峰去年與圈外女友黃思雅拉埋天窗，今年5月更於社交網宣布將為人父，昨日囝囝終於出世，Penny於社交網宣布添丁喜訊，留言：「同大家報個平安，感謝大家嘅祝福同關心，托賴母子平安。感謝醫生與各位醫護人員，我係陳國峰、我係陳國峰個仔。」
擇日開刀
昨日Penny接受本報電話訪問時難掩喜悅之情：「今日（昨日）係擇日開刀嘅，過程順利，但係我嘅心情就好似坐過山車咁，好刺激！」陪入產房剪臍帶的他笑言比參加歌唱比賽等出場時更緊張：「心跳加速，手心出汗，太太都好緊張，我有入產房剪臍帶，依家仲未同囝囝改名，不過有個花名叫『峰之子』！好感恩！原定9月6日出世，但係上星期醫生建議早啲出世會好啲，因為媽媽胎水唔夠，咁啱今日（3日）朝早出血，係生得嘅先兆。」
面珠紅卜卜
初為人父的Penny還拿着兒子的照片跟自己合照，並上載「合照」至社交網分享喜悅，剛出生的「峰之子」面珠紅卜卜，相當可愛！Penny則長滿鬚根，似乎因太緊張而未有時間打理自己。昨日凌晨，Penny於太太分娩前亦有上載二人的大肚寫真照，Penny留言指辛苦太太了，又希望太太一切順利，愛妻之情表露無遺！
文：專案組