定欣負磅輕贏晒展鵬孭山聰一仆一碌

無綫藝員陳展鵬、胡定欣、陳山聰、姚子羚、林子善、敖嘉年等昨日在紅磡為劇集《同盟》宣傳，劇集上星期三錄得播映以來最高的31.4點收視。遊戲時定欣應現場粉絲要求變身「女漢子」，輕鬆孭起子羚走石春路，巾幗不讓鬚眉。山聰隨後亦順利背着展鵬走過石春路，但到展鵬孭起山聰時卻衰收尾，兩人一仆一碌跌在台上。

子羚不足100磅

定欣受訪笑說子羚體重不足100磅相當輕：「佢好似個啞鈴咁啫，所以抱得美人歸好簡單，哈哈。」愛上拍打戲的定欣被問到可擔心嚇走追求者？她笑說：「角色嚟啫，其實我都有少女一面，需要人保護。」

而展鵬被問到是否因山聰很重而失威？他笑說：「唔係，係我少鍛煉啫。」現場播出展鵬搽了油騷肌片段，但卻被定欣取笑他搽油搽上癮，展鵬笑說：「搽咗油肌肉線條會靚啲，嗰場戲係搞笑想吸引胡定欣。（掛住同單文柔拍拖咪冇時間健身？）唔係，我成日做運動。（有場戲網民發現你耳仔受傷？）自己整親，所以冇戴耳環，有啲唔連戲。」

陳展鵬孭陳山聰初時都有心有力，但最尾卻不慎仆倒。	陳展鵬、陳山聰	一眾演員為劇集《同盟》宣傳。

睇戒指未諗結婚

而與女友感情穩定的山聰，最近被拍得到珠寶店選購鑽石戒指，他說：「唔係，睇定啫，估唔到依家啲鑽石咁貴。（預算幾錢？）銀行有幾多咪買幾多，其實女朋友冇要求。（好快結婚？）未諗，但係大家都有共同方向同目標。」提到網民發現山聰在戲中睡着的鏡頭？他說：「係呀，嗰排真係好攰，嗰晚監製拍醒咗我四次，我好似昏迷咗咁！」

文：影視組