Yanny分體式拍拖隊友：兩個都騎呢！
昨日Super Girls（SG）四缺一現身電台，對於Yanny被影到在街頭發男友脾氣，隊友群起為因病缺席的Yanny護航，指她因頸痛問題十分不適，當日與男友亦沒吵架，Jessica更踢爆Yanny與男友都很騎呢，惟傳跟Yanny爭仔不和的Heidi卻表現冷淡。
組合Super Girls的Yanny之前被本報影到與有米監製男友陳考威拍拖，但疑氹唔掂男友買錶，故Yanny食麵時一度嬲爆，之後更突然獨自到對面舖食麵。昨日SG現身電台，但女主角Yanny卻因病缺席，隊友甫現身即替她解畫，Cheronna說：「佢哋唔係鬧交，純粹係佢頸椎問題好唔舒服、皺晒眉頭，嗰日佢本身諗住食啲嘢，但因為真係太唔舒服，所以要食清湯麵，至於錶嗰度佢哋係純粹經過。」Cheronna亦謂前天她們有工作，但Yanny都因不舒服而要睇醫生。
問為何男友不陪她食清淡的東西？Jessica說：「佢哋係性格獨立嘅人。（但都唔使突然走咗？）你哋係估唔到，特別係Yanny，我哋出去食嘢，佢會突然話『我唔想食，我自己去第二度食』，佢唔想麻煩你就佢食嘢。（佢哋唔會嗌交？）少啲，兩個都咁騎呢。（佢哋感情冇問題？）冇。」
身體孱到爆
Cheronna指Yanny很孱弱，不但頸椎影響致頭痛，還有血壓過低，有坐骨神經問題的她亦說：「但我諗我啲肌肉多過Yanny，所以忍到痛，佢唔夠肌肉support筋骨先咁痛。」Aka又指Yanny本身有胃痛，所以食嘢不吸收。問到Yanny休息可會影響她們工作？Cheronna說：「唔會呀，我哋仲有4個。」而與Yanny傳爭仔不和的Heidi終於出聲：「都OK嘅！」
天生冇表情
至於Yanny昨日透過電話回覆：「我的頸椎出現問題，現在已找物理治療師治療。」她亦解釋當日因颱風關係，針灸醫師沒有開門，故男友陪她推拿，但因自己不舒服不能跟男友食有味食物，故獨自去對面舖食淨麵，希望食完快些回家休息，她強調兩人完全沒有吵架：「我們天生個樣都冇咩表情，所以成日畀人誤會心情不好。」
文：音樂組
攝：林蔚恩