自認「黑面勤」難頂！「要求高好正常」
入行逾30年的克勤除是出名唱得之人，亦有指他常黑面比較「難頂」，他亦自認麻煩：「我認我係麻煩o架！年資有番咁上下，要求高好正常，對自己團隊有要求啫！好似有啲人遲到咁，我唔會鬧，但會問點解遲囉！我嘅團隊要有紀律。」
克勤自知舊唱片公司的同事也怕了他，不介意別人在背後講是非，甚至被嘲為「黑面勤」：「我預咗人講我o架！其實我只係緊張啲工作先『板』起塊面啫！發自己脾氣咋。（知道令工作夥伴難受？）佢哋慣晒o架啦！我開演唱會，由晏晝開始已經唔出聲添，但一落台就會冇事，我唔同校長（譚詠麟）、容祖兒佢哋開騷都嘻嘻哈哈，校長都成日勸我大局已定放鬆啲，但我覺得個騷做到最後一秒，想盡力做到最好。」