余香凝強吻融化貓心

模特兒余香凝（Jennifer）因被好友廖子妤（Fish）的愛貓打動，處女下海首次養貓，Jennifer自嘲是「剷屎官」：「貓貓叫『皮蛋』，女仔嚟，佢真係好幸福，媽咪成日買魚拆骨畀佢食，我同妹妹就買零食，佢係皇帝，我哋就變『剷屎官』，每朝幫佢剷屎、餵佢食嘢。」Jennifer坦言當初遭母親反對養貓：「之前幫Fish湊佢隻貓一星期，媽咪就畀隻貓融化咗，咁啱朋友隻貓生BB，我就拎咗隻養。」她直指「皮蛋」極曳：「可能仲係BB貪玩，成日通屋跑同跳嚟跳去，我紮住馬尾做運動，佢就成日撲埋嚟，有時仲會咬損我。」視「皮蛋」為愛女的Jennifer自爆不時強吻對方：「佢之前好抗拒畀人錫，會用手推開人，可能我強吻得多，依家每個人將頭貼埋去，佢都唔抗拒。」她透露將帶「皮蛋」做結紮：「為咗佢健康，加上我又新手，驚佢有BB唔識處理，已經計劃佢半歲時帶佢絕育。」