甄子丹加碼500萬同吳京對打
吳京主演新片在內地創下逾50億人民幣票房，人紅自然被「翻舊帳」，盛傳當年他與甄子丹拍戲期間，遭對方看不起及打壓。子丹昨晚出席公開場合時澄清傳聞，坦言欣賞吳京，更曾要求電影公司加碼500萬，打造二人的對打戲。
子丹昨晚偕太太汪詩詩及蘇永康出席慈善齋宴，對於近日有傳他與吳京不咬弦，更曾打壓對方，子丹坦言向來少理是非：「但今次有不良分子大做文章，我徵詢過法律意見後，決定要以正視聽，希望啲『鍵盤戰士』唔好再搞咁多嘢喇。我有喺社交網站＠（標註）吳京，想畀佢知道有咁嘅事。」
欣賞實力派
問與吳京可有不和？子丹表示當年拍《殺破狼》時，他出聲要求製作費加碼500萬港元，拍二人的對打戲，他說：「如果不和，我點會咁做呢？（從來冇睇唔起吳京？）點會睇唔起佢？我好欣賞有實力嘅人，佢用3年時間拍一套戲，真係唔簡單。」問二人私下是否朋友？子丹直言與吳京不熟：「只係合作過拍戲。其實一個人係點，可以睇佢身邊有幾多朋友。當年夠傳我同黎明唔啱啦（兩人合演《十月圍城》盛傳不和）。事實又點呢？唔係真囉。」對於打壓吳京的傳聞，子丹打比喻說﹕「唔通我同成龍、洪金寶拍戲，我畀佢哋打傷，又話佢哋打壓我咩？（想破吳京內地票房紀錄？）50幾億人民幣紀錄好難想像，我只想破自己嘅紀錄。」
文：影視組