七魔女打風打唔甩！周家蔚生日收「肉嘴」

靚媽周家蔚日前撇低老公洪天明、兒子洪大仁（TJ）及洪竟琋（JT），與「七魔女」成員佘詩曼、湯盈盈、梁靖琪、文頌嫻、姚樂怡及鍾麗淇於10號風球下慶祝昨日的34歲生日，席間獲好姊妹送上蛋糕及紅色手袋，梁靖琪更送上「肉嘴」！家蔚表示今次已是第二次在打風下慶生：「之前試過8號風球都照常慶祝！其實打風慶祝都幾好，連餐廳都冇乜人，好似『包場』咁！」問到兒子TJ可有送生日禮物？周家蔚冧爆說：「之前佢用紙黏土造咗一個爆谷送畀我，算係我嘅生日禮物！」並透露生日願望是希望TJ聽教聽話，乖乖生性、有禮貌與孝順父母。