杜宇航冼國林同場未破冰
藝人杜宇航2014年與師傅兼經理人冼國林因合約問題反面，最終杜宇航登報感激冼國林栽培，平息紛爭。事隔三年，兩人昨晚首度同場，前後腳現身，分別受訪時稱見面「零尷尬」，不過據知兩人在場內冇碰面，寒冰未破！
「國藝娛樂」老闆冼國林、杜宇航、王祖藍、林雅詩及周嘉莉等於尖沙咀出席「廣東好萊塢影視扶持政策」香港發布會，冼國林與徒弟杜宇航於2014年曾經因為經理人合約而鬧翻，最終杜宇航於報章刊登聲明感激冼國林栽培，大家終和平解約。三年來，兩人未有碰面，昨晚難得同場，因前後腳關係，未有合照。杜宇航與冼國林分別受訪時，均表示沒有因與對方同場而感尷尬，杜宇航說：「今次係佛山市政府請我嚟。（同冼國林同場有冇尷尬？）雖然近年比較少聯絡，各有各忙，呢個圈唔大，就算碰面都冇尷尬。」
「佢冇過嚟打招呼」
冼國林亦指與杜宇航零尷尬：「任何做影視的人都是一家人。」據知，兩人在場內冇碰面交流，冼國林說：「我坐主家席，見唔到佢，佢亦冇過嚟打招呼。（佢過嚟打招呼，你會點？）做人要大方，都過咗咁耐。」談到佛山政府推行的「扶持政策」，冼國林指旗下國藝影城在佛山已發展七年多，十分成熟，中國政府想大力推行影視產業，希望打造廣東荷里活，與美國Hollywood及印度Bollywood看齊。問到是否賺很多？他說：「開心嘅！守得雲開，上市公司唔講得實數，只可以講依家影城佔用率有九成多。」
另外，祖藍指風勢剛減弱就驅車前來，路途上遇到不少塌樹，好似障礙賽。至於未來工作，他指會有套劇投資做出品人兼在國藝影城拍攝，問到會否找太太李亞男做女主角？他說：「吓，又玩啲咁嘅嘢。（搵太太做女主角可以控制親熱戲嘛？）睇完馮德倫做導演嘅電影《俠盜聯盟》，見舒淇差唔多咀嘅時候，都係唔咀得，自己就唔會，創作最緊要。」
文：影視組