梁麗翹疑遭非禮鬧爆阿伯磨臀「推進」

藝人梁麗翹（Nicole）昨日於社交網自爆搭升降機時遇到不愉快事件，指稱遭阿伯「博懵」，並講述事發經過：「在排隊搭升降機時被一位阿伯摩擦臀部，還用身體把我『推進』擠迫的升降機裏，直到我大叫才停止。已經係第二次發生類似事件。擠迫就可以作為藉口嗎？香港人煙稠密，究竟我們有甚麼方法可以令大家學懂尊重其他人的個人空間？」博文甫出，即有不少網民留言為Nicole抱不平，但同時竟有網民指Nicole已婚，被人摸又不會「少忽肉」，叫她不用介懷，令Nicole為之氣結，並留言自我勉勵：「女士要強大起來！」

氣憤遭網民嘲諷

Nicole昨日接受本報電話訪問，提到事件仍氣憤難平，她說：「我排緊隊搭升降機，之後啲人出升降機時，有個人喺後面撞我咁推我入去，正常幾逼都唔會咁，我當時睇吓係咪手袋，但原來係個阿伯，之後我就即刻大嗌，當時全架升降機冇人幫我，個阿伯仲話唔緊要，我即刻話：『依家係你博緊我懵呀！』佢即刻唔出聲！」Nicole表示說出來是希望女性遇到這些事時要出聲，對方認不認都好，都要保護自己。對於有網民暗指她小題大做，Nicole坦言感到不快：「結咗婚就可以任人亂嚟o架咩？」問到有否報警，她說：「都係嬲自己冇報警，因為嗰陣時間太趕，我鬧完佢之後，放咗佢一條生路。」

文：專案組