任達華被問嫩女示愛硬軚標汗
任達華與劉嘉玲相隔25年再合作英皇電影《我的情敵女婿》，於戲中任達華周旋於嘉玲與衛詩雅之間，問到現實中可有被年輕一截的人追求？嘉玲大方直認有，笑言要畀老公梁朝偉危機感；相反任達華則表現尷尬，標汗兼「硬晒軚」，嘉玲都不禁為他抹汗「降溫」，場面搞笑！
劉嘉玲、任達華前晚於灣仔為英皇賀歲片《我的情敵女婿》開工，英皇集團老闆楊受成亦有到場探班打氣，劇情交代二人相隔多年於雲吞麵檔重遇。前晚天氣酷熱，個個都熱到標汗，但嘉玲因劇情需要，還要穿黑色皮褸作型格打扮，有苦自己知！
同衛詩雅爭仔
戲中任達華與嘉玲及嘉玲的養女衛詩雅有感情瓜葛，對於相隔25年再與任達華合作，嘉玲笑言恍如昨日：「（上次合作）好似尋日嘅事咁，最緊要係我哋愈嚟愈靚。（同任達華有親熱戲？）佢同我個女（衛詩雅）多啲，我真係生得佢出！」
嘉玲更笑言戀愛無年齡界限：「法國總統都係咁，呢啲事（忘年戀）依家係會發生，重點係兩母女、做阿媽嘅我依然咁索。（有冇大年紀嘅男士追過你？）梗有，依家都有年輕人欣賞我。（偉仔知唔知？）有啲嘢唔講得，要畀啲危機感佢，但如果有後生女鍾意佢，我都戥佢開心，恭喜佢，佢咁嘅年紀喎！」
囡囡餵牛扒
當記者問到任達華有否試過被年輕女生示愛時，不知何故，他忽然「硬晒軚」兼目不斜視，不停標汗地說：「得我個女。」嘉玲乘機戲弄，邊為他抹汗邊說：「講真話！」惟他堅稱：「得我個女，我手傷佢幫我切牛扒，老婆餵我飲湯，好浪漫。」
文：影視組