家姐拍拖全家開心張寶欣恨見袁偉豪
十位候選港姐昨日到銅鑼灣試戴名貴首飾，(10)張寶欣由佳麗互選奪得「最佳首飾演繹佳麗」獎項，她靠跑步和節食減去6磅，問到受佳麗歡迎可擔心會承繼家姐張寶兒奪「友誼小姐」獎項「魔咒」？張寶欣笑言不怕：「名次唔重要，友誼小姐都幾好，代表佳麗認同。就算評判唔認同係因為表現唔好，唔係為人唔好。」
她還大爆家姐與袁偉豪蜜運很開心經常甜笑，期待家姐帶袁偉豪回家見家長：「家姐好少主動講感情事，我睇報道八卦去問佢，我見到媽咪睇到都笑。（媽咪好滿意袁偉豪？）媽咪都好驚喜，佢對我哋揀對象唔會太嚴謹，有上進心嘅男仔就OK。」
(6)邱晴成長於單親家庭，她講起媽媽即刻眼濕濕：「今次參選，係想令媽咪驕傲有我呢個女，佢全力支持我，仲陪我一齊減肥。（爸爸知道你參選？）我哋好耐冇聯絡。」男仔頭性格的(7)黃凱琪平時少戴首飾，希望第一套名貴鑽飾是爸爸送，讓他知道女兒已經長大！至於(1)何依婷喜歡鑽石，希望靠自己賺錢買。