張智霖留鬚滲佬味阿仔嫌肉酸

古天樂、張智霖、鄭嘉穎、鄧麗欣及陳庭欣等，昨午到屯門出席新片《L風暴》開鏡禮。古仔與Chilam早年效力無綫時已有合作，嘉穎則於十多年前曾與Chilam合作拍攝《西關大少》，難怪三人聚首即雞啄唔斷！

古仔飾演被人冤枉的廉署調查員，嘉穎向他展開調查，警察Chilam則負責幫古仔「翻案」，三人關係錯綜複雜。三位型男齊齊受訪時，古仔踢爆嘉穎是「水造」：「頭先拍三頁紙對白，環境好焗，見佢不停流汗！」嘉穎即自嘲大汗如瀑布，需不時抹汗。

老婆愛到唔准剃

古仔透露將有連串飛車戲，Chilam則連日拍攝槍戰場面，認真搵命博！問到可擔心有危險？古仔說：「平日我唔揸車，有得飛車好開心，拍嘅時候會封路。」Chilam則相信香港電影團隊的專業。問到為新片留鬚，造型可有惹來太太袁詠儀投訴？他說：「佢不知幾鍾意，拍完都唔畀我剃呀！不過阿仔話肉酸，佢專門打擊我！」

鄭嘉穎（左起）、古天樂及張智霖三大型男聚首，片中有連番激戰。	鄧麗欣穿Bra top上陣晒纖腰，陳庭欣的造型則相對密實。	陳庭欣

嘉穎讚女友好手勢

同是「8月壽星」的嘉穎與Chilam又齊齊放閃，提到早前生日獲女友陳凱琳下廚，嘉穎大讚女友廚藝好：「好味！佢用Slow cook煮三文魚扒，外熟內軟！」至於27日生日的Chilam打算放自己一日假，最想與老婆落場打牌慶生，問到屆時會否約「牌腳」郭富城？他說：「呢排少搵城城，各有各忙。」

此外，片中飾演私影女郎的鄧麗欣穿Bra top出席開鏡禮，並透露拍攝時應導演要求將一頭秀髮染成多種顏色：「但另一部戲要將頭髮噴黑扮女警，相信拍完髮質會好差，預咗要剪髮。」

文：影視組