無綫藝員袁文傑與女友張潔蓮拍拖六年，他昨日受訪時透露計劃兩年內結婚：「我哋一齊咗六年，都差唔多時間。」雖未向女友正式求婚，但大讚女友有愛心，兩人也很了解對方。袁文傑與女友都喜歡小朋友，但未決定會否生BB，他說：「小朋友暫時冇諗，我同佢喺事業都要集中應付，有小朋友可能係額外負擔，自己思想好開通，助養、供養反而有諗過。」
袁文傑指好友更緊張其婚事，最近與江美儀和陳啟泰等前亞視舊同事飯敍，自然被催婚及要求將婚禮大搞，他笑說：「自己性格低調啲，結婚形式未定，未確實去諗。」
問身為阿仙奴忠實粉絲的他有否想過到球會主場影婚紗相及行禮？他笑說：「去影結婚相都係好事，如果搵埋雲格（阿仙奴領隊）做證婚人就好，自己真係諗多咗，哈哈。」