李克勤舞到半天吊自轉想嘔
歌手李克勤昨日為9月3日至11日合共9場於紅館舉行的《李克勤慶祝成立30週年演唱會》進行排舞，一向並非「舞林高手」的克勤為個唱下苦功，自爆練吊威吔自轉動作時幾乎想嘔！他更稱為幫補兩子書簿費，開騷前仍繼續做商演「賺到盡」。
克勤聯同18位Dancers在排舞室為個唱緊密排練，連場勁舞的他卻稱只是前菜：「啱啱喺西安商演完返嚟，呢隻舞大家睇以為係一個豐盛晚餐，其實只係一個前菜，係酸薑蕎頭！排舞師好睇得起我，佢話歌手唔同階段要有唔同進步，我就係跳舞。我嘅跳舞天分有限，但我勤力，希望可以畀到不一樣嘅感覺大家！今次跳舞比例係多嘅，尤其第一首歌《舊歡如夢》，到時睇我45度角『un』住嘅動作有冇唔同。」
呼籲準時入場
克勤再次認真呼籲觀眾要準時入場：「如果遲到就可能睇唔到場勁舞，有啲吊威吔場面，我會係咁自轉。當日我練轉嗰時，仲好『牙斬斬』話後生嗰時周遊列國去玩過山車，點知去練嘅時候就轉到想嘔，內臟反晒，勁轉差唔多二、三十個圈。」
冇機會騷胸肌
雖然距離演唱會不足兩星期，但勤力的克勤仍繼續商演，他笑言：「我兩個仔仲好細，要賺番啲書簿費幫補吓。」講到練出胸肌，但克勤稱個唱沒機會騷肌，更聲稱：「我有8舊肌肉，練到有『波地』（口架）！但今次啲衫話係唔使露，咁我要聽Wyman同太太話，啲衫係佢哋負責，要聽從家長指引，扣少粒鈕都唔得。」不過，搞笑的克勤完成訪問後，就作狀夾出胸肌騷Quali給大家拍照。
文：音樂組