座駕捱撞反被鬧孫耀威（興）爆報警

孫耀威昨日與太太陳美詩飛往北京參與中央台節目演出，中午在港出發往機場途中，在尖沙咀發生交通意外，座駕被撞花，他在社交網上載皺眉頭的照片，並留言：「撞車……報警……」事後他表示因撞車，以致幾乎趕不及飛機：「當時係我揸車，Macy坐喺隔籬。（有冇受傷或Chok親？）冇傷，好彩我哋兩個都冇事！」Macy亦說：「我都唔係好驚。」

飛抵北京後，Eric透過電話講述撞車經過：「當時我架車喺個彎度轉，因為塞車關係，大家都喺度攝吓攝吓，意外一刻我架車停咗喺度，有個人夾硬要攝埋嚟，最後佢架車身撞咗埋我架車度囉！我聽到『咔』一聲，唔係撞凹得好勁，不過佢刮到我車頭，好彩我架車有晒Camera，錄低晒囉！」

返港再落口供

Eric透露當時很多途人拍照，甚至做直播，由於涉事司機態度惡劣，他最終報警處理：「好搞笑，本來嗰個人都幾惡吓，佢架車係郁嘅，撞落我停嘅車度，但仲好惡咁話係我攝咗佢個位，後尾佢見到啲人喺度拍片，就淆底搵個口罩戴住，跟住我就寸番佢：『你咁大聲鬧人又喺度驚？又要驚又要戴口罩，咁不如唔好鬧啦！』跟住好快就有警察嚟咗喇！」他表示事件交由警方處理，與太太返港後會再去落口供。

文：音樂組