梁潔華粵劇養生：做咗半世人先識呼吸

粵劇又稱大戲，對曾是藝人的梁潔華來說，人生的大戲要數早年患上急性白血病（血癌），日前她偕師妹千珊受訪，暢談人生的虎度門，她說：「其實我好感激上天畀我認識粵劇，以往我做嘢好急躁，但粵劇係如果想唱得好，就要學識呼吸嘅藝術，之前我病，就係因為生活過分緊張，搞到身體唔好，唱戲係愈緊張愈唱唔好，我係喺粵劇裏面學懂養生之道，學識放慢生活，我做咗半世人先學識呼吸同放鬆自己！諗番當初學粵劇，其實係因為嗰時同事話我把聲好啱唱粵曲，我都想搵師傅學，後尾想當埋減肥，就跟名伶文千歲學粵劇。（粵劇減肥得咩？）得，睇我以前啲相幾肥就知！」

9月演出《紅樓夢》

梁潔華拜師後，才初窺粵劇藝術堂奧，她說：「我讀藝訓班（無綫）出身，起初以為粵劇好簡單，原來處處係學問，師傅係有教無類，睇你程度再安排你演出，我有幸同師傅同台演過《白蛇傳》，我鍾意神仙故事，想像空間大！（囡囡黃芷晴被你薰陶都愛上粵劇？）佢對粵劇唔了解，平時跟佢爸爸學做戲，反而我同師妹千珊就講粵劇講唔完，我當咗佢係第二個女！我哋9月喺高山劇場演出《紅樓夢》，我做埋策劃，明年仲會有兩大演出計劃，但香港演出場地真係唔夠，希望政府做多啲，支持年輕一代粵劇表演者！」

梁潔華於粵劇中學懂養生之道。	梁潔華與千珊（右）一走埋就傾粵劇。	千珊的小生造型相當俊俏。

師妹千珊有抱負　望吸納外國觀眾

近年本地湧現不少高學歷粵劇新血，包括曾與龍劍笙合作的花旦李沛妍，及高等學府畢業、放棄高薪厚職也要追逐梨園夢的千珊（蔡蔚珊），她說：「我係12、13歲學戲，倫敦大學畢業，後來演藝開粵劇課程，我正式由興趣轉職業。（搵到食？）早幾年粵劇係有啲式微，但近年興旺咗，屋企都全力支持我，我對粵劇有種抱負，要做到承傳同保育！之前我去北京出席《歡動北京》，好多唔同國家都派代表介紹本國藝術，我同演藝同學介紹南音，再由一男一女演出粵劇，反應好好，希望未來將粵劇介紹畀多啲年輕人同外國觀眾！」

文：影視組

攝：劉智源