梁漢文GD上身歌迷埋身攬到實

一連兩場的《梁漢文我的另一半音樂會》尾場於前晚8時30分開場，Eason百忙中抽空連睇兩場，同場有楊千嬅，加上台上的Edmond，「華星三寶」再次共聚一堂，謝霆鋒則送上花籃。大批歌迷獻花及要求合照，Edmond統統來者不拒。去到快歌環節，全場歌迷興奮站起，前排粉絲更湧到台邊，連千嬅亦跟大隊一齊跳！Edmond在Encore環節坦言下了不少苦功記歌詞和練琴：「我知我有錯，但盡咗力，希望大家感受到。」又不忘感激太太為他準備歌衫。期間，有歌迷點唱《九九九》，Edmond坦言忘記歌詞，有觀眾見狀遞上手機提示，中途卻有來電，認真搞笑！

Edmond騷後受訪時表示很滿足：「觀眾好齊心，同我一齊死唱爛唱。（畀歌迷點歌考起？）少少啦。」並表示對場地有點陌生，而且與觀眾很近，所以首場表現略為緊張。他大讚舞台設計出色，但要經常上落樓梯，有點疲倦，又說：「今晚處理氣氛都OK。（有冇畀歌迷抓傷？）少少啦，我啲朋友寸我，話啲歌迷好似當咗我係GD！」

呢位歌迷攬實偶像唔願放手。	Eason（右）連續兩晚捧場，同郭偉亮入後台探班。	歌迷當正Edmond係萬人迷GD（下圖），High爆全場。

Eason畀貼士

他又感激一眾圈中好友捧場，當中Eason和郭偉亮更提供寶貴意見：「講吓有咩好同唔好，同埋呢個場要注意嘅地方，又話音響好好。」提到首場自爆當年以歡樂卡求婚，他指太太事前並不知情，但覺得不算是驚喜，又強調自己有誠意結婚：「都有諗吓嘅，因為當時已經一齊咗9年。呢啲真係注定，唔係個遊戲，可能遲多一、兩年先結婚。」

千嬅睇到企起身又拍晒手。

陳奕迅、郭偉亮、許志安及劉浩龍都有捧場。

文：音樂組　

攝：司徒國榮