荷里活男女不公平的情況嚴重，不少女星都為此發聲，當中「龍母」艾美莉克拉克（Emilia Clarke）最近亦加入戰團，自爆因為「有胸」便遭遇不公平的對待，她誓要以行動打破這情況！
現年30歲的英國女星艾美莉最近密密宣傳人氣美劇《權力遊戲》（Game of Thrones），受訪時講到荷里活性別歧視的問題，她認為情況嚴重，且跟不少女星一樣都遇過不平等對待：「雖然感覺聽落好天真，但我覺得呢樣嘢好似種族歧視咁，突然有一日，你發現（性別歧視）原來無處不在，唔敢相信對方竟然會因為我有一對胸脯而給予唔同對待，我花咗好長時間先發覺呢個問題，再環顧四周，發現呢個就係我每天嘅生活。」
艾美莉認為好多時候女性好像只能在美貌與智慧之間二揀一，她立意打破這個狹隘的偏見：「冇錯，我有搽睫毛液，但同時都可以擁有高IQ，兩樣嘢可以並存，可以係同等。」她亦想採取行動來改變這狀況：「我有意開一間製作公司，請來既友善又幽默嘅女性合作，只要對方有胸，就歡迎加入！」
雖然《權》劇已經來到第7季，但艾美莉仍然會因為拍攝而感到很大壓力：「我為此失眠咗幾晚，仲不時都打擊自己話：『你今次一定會搞砸，套劇最後一季一定會出錯。』雖然朋友都叫我畀啲信心自己，信自己直覺，但我就係冇安全感，要做更多嘅準備工夫，因為企喺愈高嘅地方，跌得愈重，我唔想令任何人失望！」
艾美莉憑《權力遊戲》而人氣急升後，經歷不少第一次，好似第一次Google自己：「我已經唔會再咁樣做！因為真的太差勁，千祈唔好咁做，我知道好多人對我嘅籮柚有意見。」至於第一次遇到超級粉絲：「第一次係喺升降機，一打開門，個粉絲即刻露出難以置信嘅樣子，並叫我劇中嘅名字，不過之後就閂門，我就離開，所以……都可以啦。」她又憶述第一次與「龍」拍劇的經歷：「當時我下半身赤裸，坐喺懸崖上，當時抱住『佢哋』要好有技巧，因為要遮住我嘅私處以免曝光。」
文：外娛組