袁詠儀主動破冰成龍回敬一尺
傳與成龍擘面傳足多年的女星袁詠儀（靚靚）昨日在微博上載合照，大讚對方不計前嫌！曾和成龍合拍電影的靚靚，被指因「失場」不合作而激嬲對方，靚靚為尋求真相，親自向成龍了解，一相泯恩仇！
自從1995年合作電影《霹靂火》後，靚靚與成龍一直被傳因反面而未有再合作。昨日，靚靚在微博上載與成龍的世紀合照，還自爆在曾志偉做「和事老」下，與成龍已冰釋前嫌，一相泯恩仇！她留言：「外間一直傳言，我是讓成龍大哥生氣的女星，昨晚感謝在曾志偉先生的安排下，終於知道真相，謝謝成龍大哥對我不計前嫌，原來很久前還為我製作了一些禮物，真的很感動！大哥！謝謝你！我會繼續做一個好演員！」該禮物是成龍用《霹》片的菲林製成的間尺。
傳當年被「封殺」片約急跌
去年，成龍在內地受訪時曾怒斥不少演員耍大牌，除了以「看你幾時完」來回敬外，其實多年前還爆料指拍《霹》片後曾要求女主角補錄數句對白，但對方竟玩失蹤，成龍其後向導演會及香港演藝人協會投訴！一呼百應下，該女主角隨之被「封殺」，片約下降！雖然成龍未有開名，但女主角身份呼之欲出，矛頭直指靚靚！其實靚靚在90年代初的確紅得發紫，曾憑《新不了情》及《金枝玉葉》兩奪金像影后，但同時傳出她恃紅生驕耍大牌，近年靚靚亦承認曾因年少氣盛而得罪人多。
忘記舊仇：依家冇嘢喇！
靚靚昨日接受本報電話訪問，指前晚的飯局是由成龍、曾志偉與汪明荃發起，容祖兒、鍾鎮濤及王祖藍等都有出席：「個飯局係畀去內地工作嘅香港藝人分享吓唔開心嘅事，初時志偉只係邀請張智霖，冇叫我！不過我聽過話成龍唔鍾意我，我當然把握機會問清楚，去到有問成龍，佢話：『你唔講我真係唔記得！你廿幾年前有個活動失場令到我唔開心，但我依家冇嘢喇！』」靚靚坦言當年初入行，根本不知曾得罪對方：「我都覺得唔好意思，令成龍大哥唔開心！依家大家都冇嘢！」又否認拍《霹》片晒大牌而不和，指當年因沒有人通知出席電影宣傳，令對方有所誤會，但堅稱當年從沒有被他封殺。
採：影視組
文：專案組