周文健談舊愛：可以搵關淑怡拍打戲！
轉戰飲食界的影星周文健，昨日現身與友人夾份投資150萬元的生煎包店，講到舊愛關淑怡早前承認普通襲擊罪，他先關心對方留有案底可會影響工作，隨即笑言其他人可以找她拍打戲或功夫片！
現年56歲、淡出幕前多年的周文健（Michael）近年轉戰商界，昨日他以廚師造型現身有份投資的生煎包店，並落手落腳煎生煎包。
Michael於2006年與年輕18年的哈爾濱嫩妻結婚，昨日未見其妻，他指太太去了辦理永久居民身份證。
廿年冇聯絡
問到可有與舊愛關淑怡聯絡？Michael即尷尬笑言已廿多年沒見過對方：「我哋嗰陣仲係Call機年代，依家連佢微信係咩都唔知，冇同佢聯絡喇！」關淑怡早前與酒店職員發生爭執，Michael表示知道此事，說：「佢咁細粒，打完人可能自己會手斷。」當記者告知他對方承認普通襲擊罪，被判罰款2,000元及留有案底後，Michael即關心地說：「咁佢有案底係咪唔可以再唱歌？」記者表示不會，他即笑言：「咁其他人可以搵佢拍打戲或功夫片！」
唔怕競爭大
提到新店是加盟店的第一間，Michael表示與朋友夾份投資150萬元開設，下月會在旺角開分店，今次他已非首次做飲食生意，之前有在內地開設火鍋店。講到「生煎包王」蕭潤邦（Oscar）都是開生煎包店，更有幾間分店，問到可怕競爭大？Michael說：「唔怕，我哋味道唔同，同埋有麥當勞，唔通啲人就唔可以做漢堡包？咁樣先畀多啲選擇大家。」
文：音樂組