陸永老婆同欠債父劃清界線

Rap而優則演的組合農夫，成員陸永及C君近年演出電視劇又主持節目，人氣急升，當中育有兩個女兒的陸永與太太Reina一家四口經常在網上晒幸福。不過，前晚Reina突然在社交網以本名陳莉娜發聲明，指有關一位陳姓先生或某材料工程公司對外一切行為及金錢糾紛，一概與她無關，並強調若有人以其丈夫藝人身份向她作出任何要挾、騷擾等行為，她定會報警處理，並保留一切法律追究權利。

借錢冇還過

陸永現身在丹麥與鄭裕玲、C君及馬國明等拍攝無綫旅遊特輯，他透過短訊回覆事件，透露聲明中的陳先生是太太的生父，但父女關係疏離：「佢爹哋媽咪喺佢好細個就離咗婚，佢同爸爸一年見嗰一、兩次，但太太因為佢爸爸一啲欠債被人騷擾、滋擾得好犀利。」他又透露太太一年前與朋友合資開設美容院，並找做裝修工程的爸爸協助，完成裝修工程時已經付清所有款項，惟美容院正式營業時，不時有工人及其他人上門追數，陸永說：「佢哋話收唔到錢，我哋先知道有咁嘅事！」他坦言太太不停受滋擾，由於無法處理，Reina最終決定退股離開美容院。

可惜事件未有因此而告一段落，陸永說：「最近唔知係咪有另一啲債主，又去騷擾嗰間已經唔係屬於我太太嘅美容院，又不停打電話要搵我太太出嚟，甚至仲話要搵埋我添！」他認為債主應該找陳生本人處理，因為這是其私人事務，陸永又無奈地自爆曾借錢給外父：「我哋已經幫唔到佢，喺呢件事發生之前，我哋唔知佢咩原因欠人錢，我哋當時係有幫佢，當借錢畀佢，數目幾多唔講啦，佢都冇還過。發生呢件事後，我哋不停畀人騷擾，我哋真係幫佢唔到，呢啲可能係睇唔到有幾多嘅債。」

當事人玩失蹤

陸永強調他與太太都無法聯絡陳生，對方從來都不現身，之前幾次他們亦只是透過中間人，再經親友協助才聯絡得上，他續指陳生得知收數事件後，雖然口講會處理，惟每次都得個講字：「我太太覺得煩到人哋，又擔心會影響到我，佢好焦慮，而我又擔心太太，所以冇辦法下先出聲明。」

「希望老竇似番個人」

Reina向來與父親關係疏離，連父親節亦只上載母親的照片，並留言暗示家中多年來母兼父職。她近日連番在Instagram（ig）吐苦水，留言指最近為父親的事感到困擾，不少網民和朋友都留言安慰她，指她有個好老公，日前她就在ig留言：「『搞到啲仔女冇所謂，但係唔好畀我條女知就得！』有幾多個爸爸可以講出呢啲說話？」較早前，她亦在ig表示羨慕別人有個好爸爸：「陸生（陸永）會提醒我，我有個好好嘅老公！#點解我有個咁不負責任嘅老竇#從來冇奢望姓李只希望個老竇似番個人！」似乎今次事情令Reina忍無可忍，決定要與父親劃清界線。

Do姐帶挈風生水起

陸永與C君組成的組合農夫出道10年，因歌曲夠貼地曾經紅極一時，可惜工作未如理想，兩人更自爆戶口試過只得雙位數結餘。不過簽約無綫後，兩人夥拍鄭裕玲（Do姐）拍攝旅遊及問答節目後大受歡迎，網上瘋傳三人的搞笑互窒片段，農夫憑搞笑作風及出色口才「入屋」，工作接踵而來，身價三級跳！

兩人除了拍攝節目、做主持、拍劇及參演電影外，又擔任品牌代言人，並宣布11月舉行演唱會，估計年賺過百萬，吸金力激增！兩人細屋搬大屋，陸永更以月租3萬租住三層的村屋，希望讓太太及兩個女兒有更好的居住環境。

文：音樂組