陳豪操Fit副偈 攤長嚟「造」多個
藝人陳豪、田蕊妮與龔嘉欣等前晚與李佳芯等到尖沙咀出席新劇《誇世代》煞科宴。講到太太陳茵媺復出拍戲，「無劇一身輕」的陳豪接手做「湊仔公」，問到小朋友有否嘈住要媽咪？他講起家人即冧笑說：「OK嘅！始終Daddy比較Easy，媽咪就會Set the rule。（練到咁Fit，有心有力再追一個？）我唔Say No嘅，有健康體魄先有健康嘅BB。我哋都鍾意BB，但要攤長啲先，唔好咁密！（上次茵媺拍一部戲又有咗？）今次拍多幾部先啦！」
至於阿田早前在社交網留下感言，被誤會將退出幕前，講到出席「榮休晚宴」，她笑說：「要講聲唔好意思！有記者打畀老公（杜汶澤），以為我真係退休。（老公有冇叫你唔好做？）佢鼓勵我有好角色不妨去做，但做完50集都有問我會唔會太辛苦。」
