現年55歲的「靚佬湯」湯告魯斯（Tom Cruise）出名愛親身拍高難度動作戲，但日前在倫敦拍《職業特工隊6》「樓過樓」場面時兩度失手，直撞大廈外牆，落地時表情痛苦更拐住行，傷勢令人擔心！
《職業特工隊》（Mission:Impossible）系列是靚佬湯叫好叫座的王牌電影，出名瞓身的他每集的動作場面既出位又險過剃頭，但他在英國時間周日在倫敦為《職工6》開工時，兩度失手受傷！
美國傳媒流出兩段片，當中拍到靚佬湯由一幢大廈的屋頂，跳到距離頗遠的對面大廈，再由該大廈的邊緣爬上屋頂！最先曝光的影片中，見到綁上威吔的靚佬湯高速助跑起跳，躍至半空，落在對面大廈的屋頂邊緣，雙手掹住邊緣位置爬上屋頂，見他幾經辛苦爬到頂時，狀甚痛苦兼一拐一拐。起初以為表情乃劇情需要，不料靚佬湯行過鏡頭後即時跪低，面容扭曲似乎堅痛，工作人員即上前慰問，他死頂揮手示意無礙後，慢慢起番身，但仍拐住行去屋頂邊緣，再由威吔吊返去起始的屋頂，未知是否受傷仍繼續拍！
另一段片就見到靚佬湯起跳同樣失敗，更嚴重是他整個人撞埋大廈外牆，還被撞到彈開，在兩幢大廈中間半天吊！雖然鏡頭距離頗遠，但仍聽到他撞牆的「嘭」一聲巨響！兩段片時序未明，但靚佬湯失手至少兩次，有指傷勢可能比預期嚴重，而他與電影公司仍未回應！
其實靚佬湯多次「玩命」拍戲曾出意外，早年拍《壯志凌雲》（Top Gun）跳降傘戲時，降傘入水險被拖到水底浸死，幸特技人員發現，為他割斷降傘！至於2003年拍《最後武士》（The Last Samurai），靚佬湯騎機械馬與日本男星真田廣之搏鬥，因機件失靈而受傷，更險被對手把劍割頸！《職工》集集都有誇爆危險場面，，第五集他則徒手爬上準備起飛的飛機，隨之飛上5,000呎高空！
文：外娛組