卓韻芝公審麵店嬲到掟匙羹

藝人卓韻芝與外婆相依為命，兩婆孫經常一起出街、旅遊，前日她帶婆婆去天后一間麵店食麵時，卻發生不愉快事件，她在社交網站上載店主的相片，並留言指當時婆婆覺得魚蛋粉的湯底有怪味，她擔心是洗碗水或是廚房出錯，便要求店員換一碗麵，反被對方指耍花樣。阿芝坦言當時嬲到連匙羹都丟到地上，但沒有爆粗或太激動，保持了少許儀態。

此文一出，在網上引起很大回響，有網友覺得食店的服務態度差，叫阿芝婆婆不要不開心，但亦有網民指當時坐在阿芝旁邊，差點被阿芝的匙羹掟中，更大爆她不斷講粗口「Fxxk」鬧人，並聲稱當時有拍片，會將片段公開，亦有人批評她恃住公眾人物，另有人斥她此舉涉網絡欺凌。

「阿婆精神過你」

阿芝至昨日仍未平息怒火，她透過電話回應，認為事件很荒誕：「點解唔相信廚房係會搞錯嘢呢？一碗嘢客人只係食咗一啖，要求更換，換番一模一樣嘅，唔通係為咗玩嘢？阿婆話碗湯味道好淡，佢反而話老人家味覺有問題，我閘住呀！我阿婆精神過你！」她又指不會因為是公眾人物而忍氣吞聲：「你畀錢食嘢，食物有問題，反而畀人鬧，你會唔會忍氣吞聲呀？」她更直斥該店令香港的地道菜蒙羞，並表示是最後一次回應此事：「免得呢件事同佢嘅食物一樣，壞品味，bad taste！」

文：音樂組