藝人陸永的太太日前帶着五歲大的女兒去街，期間囡囡人有三急，陸太拖着女兒衝入商場內一個兼有育嬰設備的傷殘人士廁所解決。豈料完事後，門外一名女士竟有微言，被寸的陸太不是味兒，在網上發文抒發感受，有網友為其遭遇感到不值。
陸永育有一對寶貝女陸一穎（Hannah）及陸一心（Simsim），其太太Reina日前帶了五歲的Hannah外出為老公取眼鏡，期間Hannah突然表示人有三急，並急到要夾住雙腳行路，Reina立即帶女兒找洗手間解決。她在社交網發文講述事情經過：「一入廁所範圍，左邊一間傷殘人士廁所加育嬰室，隔籬又有一間育嬰室，咁啱有人喺入面出嚟，我就拖住佢衝入去傷殘人士廁所加育嬰室嗰間屙，急到屙濕咗條褲，全程三分鐘左右。一出門口，有個女人拖住佢個識行嘅小妹妹畀說話我聽，『咁大個都仲用呢個廁所！』」
此言一出令Reina感到不是味兒，她繼續發文：「喂！我個女真係好急呀！有廁所係咪唔用呀？你個女都識行啦，咁仲叫唔叫嬰兒呀？大家都係父母，畀啲同理心得唔得呀？你個女着住尿片，我個女真係急到瀨(口架)！」但原來這只是她的心底話，當時並沒有說出口，她只回了該女士一句：「係呀！我個女頭先太急，唔好意思。」有網民替她感到不值，並讚她有修養。記者聯絡上陸永，他表示：「我理解個殘廁內係有塊育嬰板，如果有人覺得唔好，我太太同佢道歉係應該嘅，始終殘廁係提供畀傷健人士使用，而我個女亦已經唔係嬰兒，令人有不便講句唔好意思，小朋友當時太急。」
另外，陸永將會出埠工作一段時間，Reina在網上晒全家福。相中Simsim戴住太陽眼鏡賣萌，Hannah則錫錫爸爸，陸永表現不捨，而陸太自爆：「巨蟹座顧家男次次出trip前都會瞓唔着，我捨不得你。」陸永之後又上載照片，笑言逼太太將手機桌布換上自己的頭像：「容許我發一次老姣。I miss you。」網民都大讚他們很恩愛。
文：專案組