《星魅博》：佘詩曼喇叭熱潮 穿出少女味
東網巨星娛樂節目《星魅博》深受觀眾歡迎，每集均請來時尚達人，為大家逐一點評不同女星的衣着打扮，並帶來最潮、最in的潮流小tips！本周請來名模陳嘉容（Eunis）擔任客席主持，為大家介紹喇叭袖，她大讚佘詩曼穿的喇叭袖夠青春，可惜對boots感覺太侷促而美中不足；她又略嫌麥明詩穿的喇叭袖衣不稱身無線條。
呢一身打扮好有青春少女氣息，特別條裙好fresh，可惜失敗地方喺對boots度，對鞋包得太多，好侷促感覺，如果佢換番對船踭鞋，比較有夏日氣息啲。
麥明詩衣不稱身
呢身打扮我覺得有啲似着咗家姐套衫，見到佢嘅喇叭袖長到見唔到隻手，條裙好似唔係好啱身，如果衫袖短番啲，騷番佢隻手，甚至乎條裙短番兩、三吋，顯得修長同靚啲，依家有啲oversize咗。
譚凱琪復古得滯
造型復古得滯，髮型太整齊，如果佢吹番直落嚟、放番散，時尚感更重。佢條choker唔係咁時尚，再襯埋露膊喇叭袖top，件衫着得好靚，可惜下身太短，加上佢對密頭platform高踭鞋，令個look冇時尚感，好可惜。
吳嘉熙感覺侷促
吳嘉熙（Cheronna）呢身打扮冇乜星味，cutting鬆同闊身，佢配襯咗一條好闊嘅裙，顯得腰形唔係好突出，如果條裙窄番啲，會更好睇，加上佢對密頭高踭鞋，感覺侷促，成個組合都有啲奇怪。
