林家棟揀劇本奄尖 用心良苦！

林家棟在主演的新戲《殺破狼．貪狼》中，飾演不擇手段的政客，在泰國拍攝外景期間背誦大量的泰文對白，更試過挑戰高難度，一口氣說出半頁紙對白，他笑指當時惟有「死記」﹗問到電影竣工後，泰語是否突飛猛進？他笑說：「我哋呢啲去九龍城玩仲可以嘅，但我好享受喺泰國拍戲嘅日子，放飯可以有200個位，去洗手間又有冷氣設備，再去我都願呀。」

一日食一餐

外景期間，家棟用盡每分每秒，除拍戲外，還捉了自己的編劇齊齊飛往當地，為下一部戲開會「度橋」﹕「我哋去到嗰時，正值泰王駕崩，除拍戲外都冇乜周圍去，開完會咪落樓下餐廳醫肚囉，日日都係食嗰幾樣咋，加加埋埋我每日得兩、三小時休息時間。」提到片中有大量動作場面，家棟笑說：「有Tony Jaa喺度，我呢啲又何必（獻醜）呢？（寧願打定講泰文呢？）咁泰文好啲喎，哈哈！」

家棟刻下已開始為即將開拍的另一部新戲做準備工夫，不但留鬚，還積極減磅：「節食兼跑步囉，四月開始到依家嘞，一日一餐，會食生果同粟米，希望再減多6至8磅啦。」

笑言乜都撈

自今年電影金像獎得獎開始，家棟似刻意減產，答允接拍的電影數量不多，他亦坦承：「多人搵嘅，但唔想令觀眾失望，如果冇信心處理好（角色）嘅話就推。」是否推了很多戲？他說：「大約10個（劇本）接1個啦，好似近日內地有個故事我都幾鍾意，但佢哋話8月開機，我覺得唔得囉，所以叫佢哋搞好晒劇本先再決定。」他笑言自己其實「乜都撈」﹕「我連微電影都撈埋，近排有個劇本得到10萬獎金，想搵我幫手，我咪話好呀，大家約埋傾吓囉。」

文：影視組

攝：劉斌

髮型：Jeff Li

場地：銅鑼灣HMV Cafe

服裝：Club Monaco

化妝：Esther Huang@J.A.C.K. Timeless