謝賢衰貪玩失嘉玲撇芳芳 拒再婚叫CoCo搵啱筍盤就走
謝賢（四哥）出名風流倜儻，身邊出現過的女人，不論是蕭芳芳、甄珍、狄波拉、息影女星嘉玲，位位皆輪廓分明，性格獨特，向來瀟灑不羈的四哥，絕少公開談論生命中的女人，這次破禁逐一品評，絕對敢愛敢恨！
現年81歲的謝賢亮相奇妙電視節目《天下第一Friend》，大談生命中5個女人，當中毫不掩飾年少輕狂，大有「生怕情多累美人」之感嘆！他說：「第一個係嘉玲！同佢失敗咗，當年我太貪玩，因為細個冇錢，後來有錢，咪出去喪玩囉！玩到有日佢突然同我講佢要結婚，然後佢就嫁咗去泰國！」
「我就唔好害人啦！」
四哥並無因「愛人結婚了，新郎不是我」而約束愛玩本性，為了玩，他甚至主動與蕭芳芳分手：「蕭芳芳好乖，係我決定離開佢嘅！因為佢提議我去學英文，我心諗：『我連玩都唔夠時間，你仲要我去學英文？』不過我從而知道咗佢係好女仔，咁我就唔好害人啦！最後決定退出，我覺得自己做咗件好偉大嘅事！」
坐拉姑車「我係前夫坐前面」
直至70年代，四哥與台灣女星甄珍結婚一年即分開，他自爆曾為此落淚：「簽咗離婚紙後，我揸車上山頂喊咗15分鐘，然後我同自己講：『過咗去，唔好再諗！』，然後就放低咗！後來同狄波拉離婚，記得當年我哋辦理完離婚手續後，兩個人喺街上擁抱！因為太開心，我仲抱住佢轉咗三個圈，睇到我哋雙方律師都呆咗，哈哈！之後有次拉姑揸車接我，佢老公（鬍鬚Kong）都有嚟，仲坐喺前座，我同佢講：『坐番後面，我係前夫梗係坐前面啦！』」
撕爛兩張婚書
四哥對一個「情」字已做到「看破、放下、搞Gag」，並揚言不會再婚：「我唔會再結婚，名分係假！兩張婚書我都撕爛咗，仲結嚟做乜！況且我都『80後』啦，我同CoCo講，遇到個好嘅，就走啦！（依家仲係有心有力？）依家有心多啲，呢樣嘢冇得認叻嘅！」
另外，甄珍的Facebook帳戶早前突然被暫停使用權限，昨日帳戶恢復使用權限後，即上載初中照片，指當年因同學寄出照片參加試鏡，才開始演藝生涯，更有粉絲大讚她從小已是女神。
文：影視組