被陳豪（阿Mo）視為半個健身師傅的張繼聰，本身亦是大隻佬，對於同劇拍檔現操得一身肌肉，他讚賞說：「係佢靠自己努力經營返嚟，睇住佢由零去到依家，觀眾肯定會嘩一聲，佢真係好努力去鍛煉，我都好佩服佢，每日大家都要應付好繁忙拍攝外，佢仲要抽時間做負重訓練，即係舉重舉鐵，又要做帶氧運動，飲食要好自制，呢個過程我經歷過，所以知道係好辛苦，佢最厲害地方係喺咁刻苦情況下，心情依然好開朗，佢真係唔係地球人，唔怪得咁多人鍾意佢。」
阿聰表示兩人是鄰居，開始時他在會所跟阿Mo講解一些健身動作，他說：「話佢知點做、點練，我個教練都幫佢好多，畀啲專業意見佢，但呢啲都係其次，主要靠阿Mo自己去練。」他表示自己不能與阿Mo比較，因為對方在作戰狀態，而他目前在調整期，是另一種訓練方式要增大肌肉，他說：「舊年拍《幕後玩家》時我145磅，依家差不多170磅。」阿聰指對健身有興趣的朋友，有三件事好緊要，就是飲食、休息和訓練，缺一不可。至於餐單，他說：「要保持身形狀態，一定要走油走糖走鹽，烚菜烚肉，所有嘢係冇味。碳水化合物就要因應體脂有幾多，酌量去減。」