代父還債 拖都甩埋 又南慘到開騷都被追數

虛脫暈低起身繼續做

大佬呀！「七球」唔係七個雪糕球囉，就當你想買層700萬嘅樓，以又南當時新人嘅搵錢能力，銀行嘅「壓力測試」都過唔到啦，還錢講咁易咩？惟有「爛做」乜騷乜戲乜都接，日日幾乎做足24個鐘，捱到骨瘦如柴，仲要走去拍武打片，搞到哮喘發作虛脫暈低，但係唔做就冇水冇收入、所以吊住鹽水都照頂硬上開工，好彩佢夠硬淨，以近乎愚公移山方式，搵1蚊還7毫清債項。人生有幾多個十年？雖然甘願成為還債機器，但活喺現實嘅香港「有錢有Title、冇錢就Impossible」，陰功到問人可唔可以請佢食碗麵，大家咪誤會以為係「想見你一面」啲廣告Slogan呀！而係佢慘到連買杯麵嘅錢都冇，咁冇錢仲學咩人拍拖？結果同杜如風都散埋！捱到頂唔住爆喊佢都要抦埋一邊，唔敢畀屋企人知。

東東樊少皇仗義救急

山窮水盡「樽鹽」晨早埋咗落灶底啦！全家每月七成收入用嚟還債，剩番兩千蚊唔夠頂到月尾，唔好話搭車錢，絕路到要同圈中朋友「度水」度日，結果人哋唔借仲要唱通街，借錢如乞米果然無錯！其中有個藝人T先生仲同人亂講：「佢好唔掂，孭住好多賭債！」又南話冇嬲唔借畀佢，何況借錢係事實，仲邊有資格去嬲人哋！反而唔熟嘅陳曉東同樊少皇，好爽快就總共借咗一萬蚊畀佢解燃眉之急，呢啲「麻甩佬浪漫」真係有今生冇來世。雖則依家啲人話最驚係接到詐騙電話被呃身家，但又南就話詐騙電話有乜好驚？當年佢接「財仔」電話被問候全家多過大家食飯，連開緊騷都打嚟追數，好兄弟天佑雖然有心無力，但都喺佢身邊撐住！又南有錢都拎晒去還，仲邊有餘錢畀人呃？

最難面對被老竇忘記

錢有命有得還，但老竇有認知障礙呢個病，做仔想頂都頂唔到。唔係怕照顧老竇，而係要面對有一日佢唔記得咗呢個仔！香港父母個個望子成龍，又南可唔可以成龍Nuts哥就唔知喇，但如果有得揀，一定揀又南做我個仔囉！

Nuts哥