張紋嘉嚇破膽醜女十年大翻身

今年入行第十年的藝人張紋嘉（Crystal），無論外在或內在方面都有很大轉變，回想初出道時的青澀模樣，她笑言當時非常醜樣：「好多年都冇睇過第一個MV，唔想播，好核突！以前影相會好怕醜，覺得自己唔靚，因為我係箍住牙出道，件事好恐怖，人哋話我整容都唔知點自辯，因為嗰時真係太醜，同埋箍牙令我面形有改變。」

傻笑掩飾恐懼

經過十年蛻變，Crystal坦言現時自信心增強不少，特別是演出多齣舞台劇後，令她面對人群時的氣場變得不一樣，而她推出個人單曲後，亦慢慢提升膽量：「有時我會睇番之前啲節目，之前個人冇咁Open，好慢熱，用咗好耐時間去習慣做訪問，玩遊戲放啲，以前做訪問會做啲奇怪嘢去掩飾恐懼，會無啦啦笑呀，唔知講咩就傻笑，所以睇番都好好笑，最大轉變係依家大膽咗，冇咁驚青。」

張紋嘉坦言被人話整容都百辭莫辯。	張紋嘉當年想退出時，卻遇到不少工作良機。	張紋嘉（中）十年前以箍牙Look出道。

由組合HotCha成員三變二，再到個人發展，Crystal亦經歷過不少挫折，她坦言最辛苦的日子正是由組合身份到單飛的轉換期：「嗰時好似冇乜人識，到出歌啦，啲人就覺得因為組合冇得做，你就要自己做，好大壓力，其實我都係想做自己喜歡嘅事啫！」

單拖難搵食

除要承受別人的閒言閒語，亦要面對經濟上的壓力，Crystal說：「大家搵開三個，突然話冇，得一個人，啲客就擰頭，所以嗰時工作係好難搵。」放棄的念頭不斷湧現，當她決定要離開這一行時，偏偏又出現一些很好的工作機會，或許這是上天給她的指引：「當你諗住唔做，就會突然有啲嘢搵你，好似一啲好嘅騷、代言工作，之前有個酒商代言，真係好神奇，咁多Artists又會咁啱搵我，因為咁，我依家好少諗放棄，我信個天，我會再堅持吓，我冇嘢輸咪繼續囉！」

文：音樂組

攝：張福宏

服裝：Monki