吳業坤Rap唔掂英文拋波畀JW
近期因內地節目《中國有嘻哈》而掀起一股Rap熱潮，將與歌手JW合體開騷的吳業坤，昨日綵排時透露會挑戰英文Rap歌，但搞笑自認英文水皮，不懂唱的部分會交給JW負責。
歌手吳業坤與王灝兒（JW）昨日為8月5日的演唱會綵排，演唱合唱歌《原來只因深愛著》，他們表示將互唱對方歌曲兼互教跳舞，JW透露坤坤會挑戰她的Rap歌《Stupid BOII》，她說：「佢好想唱，入面有英文Rap，佢又想好Hip Hop咁跳住出嚟，嗰Part應該會好好睇！」坤坤卻表示不能獨自Rap整首歌：「有啲英文我真係唔識讀，要交番畀佢！」但他笑謂自己有Freestyle。
坤坤之前被網民笑不知道何謂Smart Casual而着錯衫，問到這次演出可會再挑戰？他笑說：「今次係Stage Casual，放棄西裝，會着啲Street Fashion！」JW就笑言會配合坤坤的衣着，先拉低大家的期望，屆時才會有驚喜，坤坤卻口花花叫她拉低衣領。
招呼緋聞女友睇騷
JW表示男友、家人與好友都會來捧場，並問坤坤的緋聞女友可會前來？坤坤豪言：「太多喇，我下次再開多個騷畀佢哋！」雖然他隨即指是開玩笑，但仍被JW取笑：「唔怪得你有咁多新聞，我要跟你學嘢！」提到這次是四面台演出，二人表示台下是企位，相信屆時氣氛會很好，JW不擔心會被觀眾扯落台，坤坤則笑說：「佢驚我喺台上扯佢多啲。」
文：音樂組
攝：司徒國榮