胡定欣打救陳展鵬麻甩發姣笑到碌地
視帝陳展鵬、視后胡定欣及影后鮑起靜（鮑姐）聯手「打」造的無綫劇集《同盟》，當中展鵬與定欣的歡喜冤家戲，集動作與搞笑於一身，而展鵬與鮑姐的親情戲，更令觀眾看得心如刀割！
由陳展鵬、胡定欣、鮑起靜、陳山聰及姚子羚主演的新劇《同盟》，將於8月7日起，逢星期一至五晚上9時30分於翡翠台播出。劇情講述展鵬飾演的高子杰，本來在台灣過着安逸生活，但突遭殺手襲擊，為了追查真相，輾轉間獲定欣飾演的阮清欣所救，之後更發現真相與鮑姐飾演的令熊有關，接二連三的殺身之禍亦因此而來。
展鵬與定欣在舊作《城寨英雄》打出火花，再度合作更添默契，監製文偉鴻大讚他說：「展鵬演一個因為至親而跌入充滿陰謀同計算嘅邪惡世界，演出好紮實！佢同定欣嘅搞笑感情戲，勾住年輕觀眾嘅心，佢同鮑姐嘅母子情，又會令觀眾落淚！定欣今次演出又麻甩又抵死，佢對展鵬發姣嘅戲，一定令大家笑到碌地！」
百呎劏房打MMA
展鵬如願演出夢寐以求帶有喜劇感的角色，他說：「今次操Fit體能應付動作戲，亦擺咗好多心機喺身體語言上面，劇中我同定欣好多互相整蠱嘅戲，好瘋狂，好有喜感，相信播出嗰陣，大家一定睇得好開心！」
監製文偉鴻指連打戲都帶有幽默元素，但鏡頭後卻充滿血汗：「武術指導郭追設計咗好多有趣嘅動作，有場展鵬同定欣喺一百呎大嘅劏房打MMA，狹窄空間仲要吊威吔，拍之前排咗四、五日，拍就拍咗兩晚，但就算做足安全措施，意外始終難免！有場戲講定欣用道具刀捅展鵬，個動作順利完成，但定欣件衫嘅拉鏈勾住展鵬嘅耳環，就咁扯開展鵬隻耳仔，要去醫院縫針，定欣都拍到扭傷腳，大家都好投入！」
揪心母子情
監製強調《同盟》有訊息帶給觀眾：「外界一直認為呢個劇係動作戲，其實包含搞笑、揪心母子情同台前幕後精英嘅心血，我個仔睇咗都話：『我要保護媽咪！』證明細路都覺得精彩刺激，我希望透過劇情將孝順、『義氣係普世價值』嘅訊息傳畀年輕一代！」
文：影視組