黃芷晴送足球場氹父
藝人黃日華女兒黃芷晴昨日出席新太陽廣場活動，並試做羊毛氈手工藝，她透露之前自己有個手作品牌，以UV滴膠製作首飾，讀書時也試過做羊毛氈工藝，又稱喜歡做手工可能遺傳自爸爸，大爆對方最近迷上砌迷你積木，家中的水晶櫃已經被爸爸的積木製品佔據，坦言很想為爸爸開個積木展覽。
芷晴又計劃開網上蛋糕店，最近積極整蛋糕：「我係自學，但好多朋友試過都讚我整得好專業。（家人對你整嘅蛋糕有咩評價？）佢哋乜都話好食，就連唔要嘅蛋糕邊皮，佢哋都話好食。（男友呢？）佢好搞笑，成個女人咁好鍾意食甜品。（第一個蛋糕係整畀邊個？）整畀爸爸做父親節禮物，個造型係個足球場。」