王宝宝豁出去全裸闖荷里活
藝人王宝宝兩年前因為愛情，放棄拍攝美國電視劇的大好機會。兩年後她與男友分手，再次獲得幸運之神眷顧，有機會接拍荷里活片飾演蒙古人，就算全裸上陣亦在所不惜，為事業豁出去。
王宝宝（春卷）兩年前暫別娛樂圈，毅然跟男友到澳門居住，為愛放棄事業，可惜最終分手收場。最近她已搬回香港，並決定重返幕前，更獲得荷里活片商睇中，有機會接拍一部美國電影。她說：「係一套動作片，不過我唔需要打，我係飾演一個可以預知未來嘅蒙古女仔。呢套電影搵咗好多地方嘅女仔試鏡，因為我本身有蒙古血統，而且我喺英國出世，英語對白難唔倒我。」
男人累事
「春卷」表示兩年前已有機會演出美劇《Marco Polo》，試鏡後已落實由她飾演，但她最後卻因男友而辭演。她無奈說：「都係因為男人累事囉！依家呢套劇已經做到第二季，如果當時真係接咗呢個角色就好喇！因為呢套劇喺好多地方都有播，好多人認識，其實今次呢套電影就係當時同我試鏡嘅監製搵我。我朋友都同我講，今次一定唔可以再放過呢個機會，個天唔會再畀第三次機會我。」戲中要全裸上陣的「春卷」稱：「我唔介意，始終係荷里活電影，而且全裸鏡頭同性愛場面無關。其實全裸喺外國電影好普通，但喺香港就會覺得好大件事。」
美女廚神
除了幕前工作外，「春卷」亦積極開拓其他事業，憑《美女廚房》中「味之天使」成名的她，私底下亦是美女廚神。她經常在Facebook的自創煮食頻道Cooking Bo Bo，以拍片形式教煮餸：「我以前好鍾意將自己煮嘢食嘅相放上網，好多人會問我食譜同點樣煮，我見外國好流行一分鐘嘅cooking video，覺得幾有趣，而且亦都好啱依家嘅潮流，大家都鍾意快，所以就有樣學樣，由下廚、拍片到剪接都係自己一手包辦。」
文：名人組
場地：美亞廚具