傅又宣自嘲Hea媽教仔最緊要好玩
早年重返樂壇的傅又宣，現時兼顧歌手、人妻兼人母身份，她坦言從不認為做了母親就不能完成自己的夢想。讀傳統名校的她，對兒子反以寬鬆及玩樂學習方式教學，拒絕當怪獸家長！
現年38歲的歌手傅又宣（Maggie，前名傅珮嘉）入行至今約19年，經歷過高與低，提到重返樂壇，日前她為瑞士天梭表Ballade Silicon COSC系列拍攝時，表示一切都是「堅持」：「我份堅持『堅過石堅』！一係唔做，一係就做到最好。」續說：「經歷過由有公司、冇公司；有management、冇management；由production到promotion自己一手包辦，由零到有完成品係幾辛苦，咁耐以嚟有幾度諗過放棄，但最後冇放低過，因為夠鍾意。」所以對於當年隱退，她說：「嚴格係冇隱退過，以前係唱作歌手，曾經有段時間覺得自己完全冇創作靈感，所以想休息吓，點知遇到依家老公，仲生埋小朋友。人生係好多計劃講唔埋，我就覺得不如go with the flow。」
「唔可以畀人睇衰」
同時兼顧事業和家庭，問Maggie會否難分配時間？她坦言現時雖忙碌，但從不認為不可能：「我覺得各方面都handle到，係要將時間分配得好好，我從來唔覺得生咗小朋友、結咗婚後冇咗自己，冇任何藉口推翻，只有想同唔想，冇話做唔到。」她自言硬頸，亦因為山羊座的性格特別好勝：「唔可以畀人睇衰！」早年她轉戰台灣樂壇發展，與兒子分隔半年，坦言很感謝老公周思甫諒解：「嗰半年老公負責照顧囝囝，灌輸佢點解媽咪唔喺度，我哋同囝囝嘅關係好close，咩都溝通，所以囝囝明白媽咪唔係唔理佢，只係去工作。」
沒強迫課外活動
讀傳統名校長大的Maggie表示絕不會當怪獸家長，認為小孩的童年十分重要，從不強求「死讀書」，反而讓兒子去玩：「我相信一個人外向啲，腦袋會靈活啲，而國際學校係以活動教學去解釋個原理畀佢知。」連課外活動也沒要求兒子去學，自嘲是「最Hea媽咪」：「平時游水同打吓波，語言、樂器、珠心算都冇畀佢學，因為我知道如果佢鍾意會自己同我講。」她透露兒子經常聽她的作品，並大讚他有音樂天分。至於會否考慮追多個？她表示希望多放時間在兒子身上，暫未有此考慮。
文：馮雪怡
攝：劉智源
化妝：Wing@wingdmakeup
髮型：Ason Wong@Hair（Festival Walk）
場地：Noc Coffee Shop