Mannyan改名換姓再戰樂壇
藝人林聞恩（Mannyan）出道十年終於有屬於自己的歌，以往因性格內向，錯過不少機會，明明身為家姐，卻被開創作公司的妹妹林熹瞳趕過，令她在妹妹面前全無家姐風範，改名換姓的Mannyan（前名陳聞平），決心今年重新出發！
Mannyan提到新歌及改名緣由，她說：「新歌《看不見的存在》同我入行十年境況相似，我2007年參加新秀入行，可能性格內向，唱片公司冇將我即刻推出，結果一浸3年，雖然都有曝光，但冇乜人識。當時覺得3年都未輪到我，於是唔識諗要求解約，後尾對呢行唔死心，加上妹妹林熹瞳（前名陳曉華）亦喺呢行，我想再試吓，由之前叫陳聞平，改叫林聞恩。我喺訪問其他藝人時，知道佢哋都經歷過低潮，我再冇咁諗埋一邊，今次出歌都係妹妹圓我心願。佢之前都係電視台一員，一路努力到開創作公司，我同佢相差一年，明明我先係家姐，但唔知幾時掉轉佢Head住我，佢仲似我家姐！我希望新歌令我變做『看得見的存在』，做出成績報答番妹妹嘅鼓勵！」
與主播撞樣被認錯
問到覺不覺與無綫娛樂台主播黃穎君（Burmie）撞樣？Mannyan說：「試過有個女仔同我講：『做乜尋日同你傾完偈，你今日完全冇印象？』後尾佢至同我講，話認錯咗我係Burmie，直至有次出活動，有個女仔自我介紹佢係Burmie，我哋即刻相認仲影咗相，有時我諗如果世上有另一個我都幾得意，嗰個點解唔係我妹妹呢？因為成日有人話我同妹妹唔似樣，都有人話佢同其他人似樣，但偏偏我哋兩個個樣就唔似！」
文：影視組
攝：吳文聰