方大同成棚人要養Dry爆唔拍拖
歌手方大同早年成立工作室自己捧自己，並於早前在台北舉行的《金曲獎》中獲封「歌王」，首次做「金曲歌王」的大同承認老闆不易做，既要養家又要管理公司財政，負擔相當大，成為新一代「筍盤」的他坦言寧願Dry爆唔拍拖，待公司上了軌道才覓另一半。
近年甚少在港露面的方大同在《金曲獎頒獎典禮》中，揮低一眾對手首奪「最佳國語男歌手獎」，向來少說話的他終講出得獎感受，他說：「開心同驚喜，完全冇諗可以攞呢個獎。（你好淡定？）好多朋友都咁話我，呢個係我性格，起伏唔會好大。」隨即自爆上台領獎時非常緊張。
日日做嘢搵錢
於2005年加盟華納進軍香港樂壇的大同，強調不會放棄香港市場，他說：「香港始終係我做新人嘅開始。」早年成立公司的他直認負擔大：「做音樂同開公司對我嚟講幾大承擔，屋企人都要靠我養，做音樂係幾大冒險，好彩屋企人好支持我，好幸運自己可以做到呢樣嘢。（有壓力？）冇時間諗，見步行步。」
問到有否試過財政出現問題？大同說：「咁又冇，我7日唔休息嘅，每日都做嘢。」他坦言有意搵投資者入股公司：「不過會好小心去揀，要啱對象先。」有名有利的大同可算是「筍盤」，問到有否女仔主動埋身？大同說：「我唔去飲嘢，冇乜呢個機會。（唔想拍拖？）暫時冇時間，成立公司後負擔大，拍拖唔係依家主要嘅嘢，隨緣啦！（有啱都唔發展？）起碼公司上咗軌道，唔使擔心咁多嘢先。」
文：音樂組
攝：黎志輝
場地：Grassroots Pantry