圈中的「星級靚媽」謝安琪、關心妍及伊能靜，昨日不約而同在網上分享與女兒的溫馨時光，三個「萌爆」BB一直深受網民吹捧，幾乎搶晒媽咪鏡。
謝安琪（Kay）的囡囡張靖（Karina）已4個月大，昨日Kay上載囡囡的四格表情包，見Karina表情多多，精靈可愛，之後張繼聰又上載Kay錫囡囡的溫馨母女照，並留言：「望見你哋咁得意，咩都抵番晒啦！」一直專心湊女的Kay昨日笑言從不覺得悶：「佢學嘢好快，三個幾月已經識轉身，佢好鍾意出街，之前帶佢去主題樂園玩，佢好開心不停講BB話，手舞足蹈咁！」
據知很多品牌、活動開高價邀她亮相，但她都不為所動：「好多都出好高價錢，但我冇打算做嘢住，好享受有咁嘅福分生個小朋友，好想同佢相處多啲，好老土嗰句，錢係搵唔晒，小朋友成長時間過咗就冇得返轉頭，所以我好珍惜。」目前非常深閨的她以陪伴一對子女為主，Kay自爆日前陪囝囝張瞻去游水，她因尚未收身而穿了件通花衫，結果曬到背脊有通花，她笑說：「我依家都係件藝術品嚟！」
昨日亦是關心妍（Jade）的囡囡楊榮心的1歲生日，Jade一家三口特地飛到日本沖繩為囡囡慶生。Jade在網上分享了幾張照片，相中她抱住身穿彩色長裙的心心，心心咬住肥嘟嘟的手指，眼定定望鏡頭，非常可愛！Jade越洋透露最初都擔心囡囡第一次搭飛機會感不適：「起飛時，我特登畀奶佢飲，佢飲完就瞓咗9個字，成個行程都OK，冇扭計冇喊，好感恩。」本來她很想和囡囡去沙灘暢泳，但當地太陽太猛烈，怕曬傷囡囡，所以改到泳池戲水，玩得不亦樂乎。
而台灣女星伊能靜也在網上分享與女兒小米粒攬錫的母女照，她寫下給女兒的溫情留言：「親愛的米粒，你在一點點長大。因為知道哥哥的成長如此轉瞬，那原本牽着手，跟在身後的哥哥，卻頃刻，已經看着他的背影追不上他。和你在一起的時間，於是變得如此珍稀。哺乳時喜歡看着妳漆黑發藍的眼珠，洗完澡替你按摩時會哼歌給你聽，換尿布時抓着你愛亂動的小手跟你玩換布布的遊戲。」不過有網友搞笑留意到伊能靜在小米粒房間裏，有一大包顯眼的紙尿片，即笑問：「這是植入式紙尿片廣告嗎？」
文：音樂組