李思欣賣命 爬天台捱車撞
藝人李思欣近日為電影擔任女主角，瞞住老公范振鋒危站大廈天台兼瞓行車馬路，加上略帶性感演出，令丈夫頗有微言。小倆口於家中閂埋門開會「問責」，范振鋒直言今次老婆性感演出，已是自己可接受的底線。
李思欣離開無綫後發展不俗，近日聯袂舊同事吳啟華及朱慧敏等，於內地拍攝新戲。任女主角的她在戲中演瑜伽高手，遇上車禍致失憶，醫療團隊設法喚醒其記憶以便破案緝兇。思欣直言今次戲份有所發揮之餘，更與台前幕後合作愉快，故十分珍惜是次演出機會。外表柔弱的她「藝高人膽大」，今次有幾場重頭戲玩命兼踩界，但為了不想老公擔心，她未有向對方詳細交代，「穿煲」後難免引來薄責。相關劇照昨日曝光，只見思欣於馬路中心「被車撞」，更於高空「踩鋼線」拍攝疑似墮樓戲份！
拒用替身
思欣接受電話訪問時，自言搵命博：「全部冇用替身。墮樓嗰場戲係喺二十幾三十樓高嘅天台，再爬水渠上去拍嘅，我要企上油漆罐同木板借位。話唔驚就呃人啦，好彩工作人員好照顧我。」
至於撞車戲當日，思欣表示：「嗰度雙線行車嘅，『捱撞』後成個人要瞓喺馬路中間等救援，埋位前我都有問工作人員係咪會有人負責截停後面嘅車？不過正式埋位就唔理得咁多，只係想快啲完成。」扮演瑜伽高手的她更不時以bra top登場，盡騷弗爆身形。
閉門「問責」
對於太太「自把自為」，范振鋒坦言：「事前我真係唔知咁高、咁危險，連安全帶都唔用！其實佢上部戲都試過咁，不過當時我喺度嘛。有時好難講，啲crew急起上嚟冇諗咁多。（老婆bra top上陣有冇嬲？）呢個事前有望過吓嘅，都OK啦，不過我就麻麻地（唔贊成）佢性感，呢個已經係底線。（鬧完原諒咗太太？）冇嘢，只係希望佢唔好要我擔心囉。」
文：影視組