克勤唔使爆肌 秘練小波地
李克勤昨日在颱風襲港下宣布9月演唱會終極加場，決定加開11日最後一場，在四度加開下合共九場，今次開騷出動太太盧淑儀及好友黃偉文（Wyman）出任演唱會形象指導，下周去日本買戰衣，克勤自爆已有「小波地」、「小老鼠」身段，奉旨不用操到爆肌。
昨日李克勤舉行歌迷會聚會，順道宣布《李克勤慶祝成立30週年演唱會》終極加場，由9月3日至11日共開九場，歌迷會活動因八號颱風襲港，最終延遲至改掛「一號波」才舉行，200歌迷風雨不改到場，大會更準備了九個蛋糕賀克勤加場。
搵Wyman搞形象
講到突然掛八號風球，帶小朋友到新加坡玩了三日的克勤說：「嚇鬼死我，尋晚先返到香港，工作人員仲話唔會改掛八號，所以呢啲嘢係唔可以亂講。」談到九場演唱會，他說肯定不會有檔期加場及不會開日場：「依家幾好，長長久久係幾靚仔嘅數字。」加場門票於星期四（27日）公開發售，歌迷會可優先訂票。加場歌酬可有加？克勤笑說：「呢個未講過喎，一路都以製作為主，製作好，攞少啲歌酬都冇所謂，相信老闆楊生唔會虧待我嘅！」
今次演唱會全新班底製作，克勤找得黃偉文（Wyman）做形象，雙方認識多年一直在音樂上合作，今次克勤致電Wyman表示是轉會後首個個唱：「個騷好緊要，希望可以畀唔同感覺大家，包括形象方面。（冇底線？）下星期我會同老婆、Wyman一齊去日本，佢哋叫我掹住衫尾跟住行就得喇，其他嘢佢兩個會搞。（會操肌？）不嬲有『小波地』、『小老鼠』，反而佢哋叫我唔好咁勤力，搞得『太大』嘅話啲衫仲唔啱着！」
爆老婆嬲嬲豬
早前克勤一家四口游水被人偷影，其身形很Fit沒有肚腩，他大爆太太盧淑儀因被偷影而「嬲嬲豬 」：「 佢嬲咗三日，好彩影到佢，唔係仲以為我放料，不嬲自己警覺性好高，但真係睇唔到泳池有相機，可能係一早埋伏。（唔敢喺香港游？）所以咪去咗新加坡囉！間房有泳池可以唔使着衫。（裸泳？）唔得，嚇親小朋友。」
文：音樂組